[過來人語]
不想因為發生事才說這些話，因為平日說這些話沒有人想聽，到了這種時候，大家才知道重要．
十年前因為耳患，耳鳴厲害，持續失眠，數個月沒有好好睡覺，誘發情緒病，焦慮加抑鬱．每天起牀都覺得個天是灰色的．最嚴重時連離開住所，搭升降機到樓下也覺得艱難．
認識我的人都知道，這實在太無稽．我性格外向，健談風趣，採訪新聞時天南地北都會去，高官達人也夠膽追訪．一個病，可以令我連搭電梯的膽量也失去了？事實就是這樣．病會令一個人變得不再是自己．
我記得打電話給醫生說：「我覺得好無安全感」．又打畀友人說：「究竟人生在世有乜意義？」呆在十幾層樓高望着窗口，覺得窗子外的世界，非常吸引．
每晚八時我就心跳，因為迎接漫長夜晚，沒法子入睡，身心俱疲，白天如同廢人．但遇上「正能量朋友」嘗試勸說，送上勵志說話，反而令我更覺難受．
拜託，千萬別說這些話：「做乜唔睇開啲．」「大把人慘過你．」「積極啲加油啦！」我記得自己發脾氣大叫：「係唔係唔開心我都無權先？喊都唔畀呀而家？」真切的情緒不被承認，如同爆屎渠你要逼番啲嘢入去，幾咁慘無人道．
咁應該做乜好講乜好？
就乜都唔好講，你只需要「存在」，適當「陪伴」，聆聽，不要太快去評核說話內容是好是壞，才是適當的做法．似乎我們習慣去「介入」「改造」「勸說」，太過急於提供意見和見解，這些模式對精神困擾人士是雪上加霜，令他們更不想見人，覺得你們不諒解他們．
後來，我見了私家精神科醫生，吃了適當的藥物約一年多，睡眠改善了，也認識了臨牀心理學家，掌握了一些心理健康練習．現在已十年，我整個生活模式改變，經常留意自己身心狀態，遠離讓我焦慮的人和事，一旦出現臨界點訊號立即停工休息，還定時做mindfulness練習．
不少人說：「我以為她已經康復了．」其實，康復是可以，但是漫長的．不像頭痛吃一粒藥丸，一夜就不再痛．跌跌碰碰，時好時壞．康復時間是以年計的．
依我觀察，不少自覺得自己「好健康」「無心理精神病」的人，平日其情緒波動而且對身邊人做成困擾．其實大家需要多點聆聽自己細小的聲音，脆弱的內在真我．如果身邊人有情緒困擾，對照顧者也做成極大的情緒壓力．不少人患情緒病，也因為家人同時是長期情緒病者．
我也因為有親人有情緒問題，特別去NGO上了課程，學習理解這個病的原因，一些照顅者的技巧，和同路人互相扶持．
所謂關注自己和身邊人的精神健康，再找適當的幫助並不容易．無論是心理學家（輔導為主，但可以教導我們正向思考的方法，是要練習的）；看精神科（以藥物治療，我始終認為，適當藥物治療能讓像我這種病者重新站起來的一個方法）．
差不多好起來之後，「正念禪修」（mindfulness）對我相當有幫助．(我用開呢個 https://mindfulnessapps.com/jkz-series) Jon Kabat-Zinn的書在我病時，我睇唔少．對於讀書人係幾有用的．想睇中文的話, 一行禪師的著作我推介．
平日運動我會做瑜珈，專注呼吸，拉筋好有寧神之用．另外，中藥也有一定作用．脾氣急，緊張，中醫也可以用理療藥物紓緩．
但第一步是要先認識，掃除禁忌．中文大學心理學系師生做的一個資料專頁「說書人Storytaler」，深入淺出有趣味，我個人覺得做得相當不錯． (https://www.facebook.com/storytaler.hk/)
在大學教書的日子，有不少非常優秀的年輕人，都來找我談天，表面看上去是很開心的後生仔，其實死頂，內心有不少問題．我後來才明白，我走過這條路，才更容易理解其他人的難關．
有時有公開場合，和身邊人討論精神健康，仍然有人覺得忌諱，勸我不要再講．其實，多一點講，反而讓人覺得舒泰，令大家接受這個病是可以在陽光底下說出來的．不是有事發生時，得把口講話關心精神健康就等於做咗．
轉自「說書人」
成為彼此的守護者
假如身邊有朋友有自殺嘅念頭，你同對方傾呢個話題嘅時候有咩要注意呢？如果你準備同身邊有自殺念頭嘅朋友傾呢個話題，你可以先準備一下心態：每一個人都有唔同嘅想法，並無對錯之分。每一個人嘅一生中總有啲轉捩點係會令人對世界嘅看法有所改變，如果對方嘅睇法同你唔一樣，你務必保持一個開放嘅心聽落去，你務必保持一個開放嘅心聽落去，你務必保持一個開放嘅心聽落去。因為好重要，所以講三次。
- 真誠
- 請以真誠嘅態度表達你對對方嘅關心，比對方知道有人係會緊張佢、在乎佢。即使係經歷緊一個好辛苦好難頂嘅狀態，都仲有人係可以依靠嘅。
2. 耐心聆聽
聆聽，齋聽也。比對方可以盡情咁講佢鬱左好耐嘅心事，唔需要回應好多，點下頭表示聽緊，拍下對方搏頭表示支持已經好足夠。
3.接受對方說的一切
保持同理心、不批判、冷靜、耐性。對方講緊佢嘅心事，表達緊情緒，無話啱定唔啱，你要做嘅係接受佢對你嘅信任同分享。
4. 給對方希望
不要絕望。呢度講嘅希望唔係分享你嘅意見，而係比對方知道，雖然呢一刻嘅感覺好強烈，但都都會過去嘅，唔會持續到永遠。話比對方聽「你係我嘅生命中其實係好重要」。呢個時候，動之以情比起講道理一定一定一定來得有效。
5. 避免爭論
唔好唔好唔好爭論或者發表你嘅見解，例如話比佢聽，好多人慘過佢／幸好這裡沒飢荒／聽日一定會好天嘅…每個人嘅故事都唔一樣，痛苦係好個人嘅，即使對方講左故事嘅一部份比你聽，但你都未必可以完全明白對方一路以黎係有幾辛苦。相反，你可以話：「我未必明白到你依家既感受，但我會係度陪住你，做你嘅聆聽者。」
6. 避免批評
千祈唔好同對方講「你咁樣係唔啱」、「你唔可以咁樣諗」，呢個亦都唔係上「人生的意義」嘅好時候，咁只會令你地兩個嘅距離越黎越遠，而你好有可能係佢最後一個可以依靠嘅人，所以你同對方講嘅每句說話都好重要。記住記住記住，保持開放，接受不同。
7.避免在此刻提出意見
提醒自己嘅角色係同伴而唔係專業人士，所以唔需要急於講你嘅建議或者解決方法，尤其係呢個咁難過嘅時間，事情唔係一下子就可以改變到。正如要你即刻改變一個十幾年嘅習慣，真係談何容易，所以要明白對於對方而言，改變並非一件易事。
#suicide #prevention #mentalhealth #care
Reference: http://www.helpguide.org/articles/suicide-prevention/suicide-prevention-helping-someone-who-is-suicidal.htm
– – – – – – – – – – – – – – –
生命熱線：2382 0000
撒瑪利亞防止自殺會：2389 2222
社會福利署：2343 2255
明愛向晴軒：18288
生命熱線的青年人專線：2382 0777
